Meri saari zindagi ko be-samar us ne kiya,
Umar meri thi magar us ko bassar us ne kiya,
Main bohat kamzor tha us mulk main hijrat ke baad,
Pr mujhe us mulk main kamzor-tar us ne kiya,
Sheher main woh moatbar meri gawaahi se hua,
Phir mujhe uss sheher main na-moatbar us ne kiya,
Sheher ko barbaad kar ke rakh diya us ne munir,
Sheher pr yeh zulm mere naam pr us ne kiya..…
The post Meri saari zindagi ko be-samar us ne kiya.. appeared first on Ranjish.com.
Har dard pehen lena, har khawb main kho jana,
Kya apni tabiyat hai, har shakhss ka ho jana,
Ik sheher basaa lena bichrre huye logon ka,
Phir shab ke jazeere main dil thaam ke so jana,
Mozuu sukhan kuch ho, ta-dair usay takna,
Har lafz pe ruk jana, har baat pe kho jana,
Aan to bikhar jana saanson ki mehak ban kar,
Jana to kaleje mai kaante chubho jana,
Jatay huye chup rehna un bolti aankhon ka,
Khamosh takalum se palkon ko bhigo jana,
Lafzon main utar aana un phool se honton ka,
Ik lamss ki khushbuu ka poron main samaa jana,
Har shaam azaayem ke kuch mehal bana lena,
Har subah iraadon ki dehleez pe so jana..…
The post Har dard pehen lena, har khawb main kho jana.. appeared first on Ranjish.com.
Ab yeh sochoon to bhanwar zehen main parr jate hain,
Kaise chehre hain jo milte hi bicharr jatay hain,
Kyun tere dard ko dain tohmat -e- veerani dil,
Zalzlon main to bharay sheher ujarr jatay hain,
Mausam-e-zard main aik dil ko bachaaon kaise,
Aisi rut main to ghanay pairr bhi jharrr jatay hain,
Ab koi kya mere qadmon ke nishaan dhoondhay ga,
Taiz aandhi main to khaimay bhi ukharr jatay hain,
Shidat-e-gham main bhi zinda hoon to hairat kesi,
Kuch diye tund hawaaon main bhi larr jatay hain,
Woh bhi kya log hain Mohsin jo wafa ki khatir,
Khud-taraasheda asoolon pe bhi arr jatay hain..…
The post Ab yeh sochoon to bhanwar zehen main parr jate hain.. appeared first on Ranjish.com.
Azaab yeh bhi kisi aur pr nahin aya,
Ke ik umar chale aur ghar nahin aya,
Is ek khawb ki hasrat main jal bujhi ankhen,
Woh ek khawb ke ab tak nazar nahin aya,
Karen to kis se karen na-rasayion ka gila,
Safar tamaam hua hamsafar nahin aya,
Dilon ki baat badan ki zubaan se keh dete,
Yeh chahte thay magar dil idar nahin aya,
Ajeeb hi tha mere daur-e-gumraahi ka rafiq,
Bicharr geya to kabhi laut kar nahin aya..…
The post Ik umar chale aur ghar nahin aya.. appeared first on Ranjish.com.
Apne sab yaar kaam kar rahe hain,
Aur hum hain ke naam kar rahe hain,
Tegh-baazi ka shauq apni jagah,
Aap to qatl-e-aam kar rahe hain,
Daad-o-tehseen ka yeh shor hai kyun,
Hum to khud se kalaam kar rahe hain,
Hum hain masroof-e-intizaam magar,
Jaane kya intizaam kar rahe hain,
Hai woh bechaargi ka haal ke hum,
Har kisi ko salaam kar rahe hain,
Aik qataala chahiye hum ko,
Hum yeh elaan-e-aam kar rahe hain,
Na uthe aah ka dhuaan bhi ke woh,
Ku-e-dil main khiraam kar rahe hain,
Us ke honton pe rakh ke hont apne,
Baat hi hum tamaam kar rahe hain,
Hum ajab hain ke us ke kuchay main,
Be-sabab dhoom-dhaam kar rahe hain..
The post Apne sab yaar kaam kar rahe hain.. appeared first on Ranjish.com.
Tumhare sheher ka mausam barra suhaana lage,
Main ik shaam chura loon agar bura na lage,
Tumhare bas main agar ho to bhool jao humen,
Tumhen bhulaane main shayed mujhe zamaana lage,
Hamare pyar se jalne lagi hai ik duniya,
Dua karo kisi dushman ki baduaa na lage,
Na jane kya hai us ki be-baak ankhon main,
Woh mu chupaa ke jaye bhi to bewafa na lage,
Jo doobna hai to itne sakoon se doobo,
Ke aas paas ki lehron ko bhi pata na lage,
Ho jis ada se mere sath bewafayi kar,
Ke tere baad mujhe koi bewafa na lage,
Woh phool jo mere daaman se ho geya mansoob,
Khuda kare usay bazaar ki hawa na lage,
Tum aankh muund ke pe jao zindagi qaiser,
Ke aik ghoont main shaayed yeh bd-maza na lage..…
The post Tumhare sheher ka mausam barra suhaana lage.. appeared first on Ranjish.com.
Mere hum-nafass mere hum-nawaa, mujhe dost ban ke dagha na de,
Main hoon dard-e-ishq se jaan ba-lab mujhe zindagi ki dua na de,
Main gham-e-jahan se nidhaal hoon ke saraapa huzn-o-malaal hoon,
Jo likhe hain mere naseeb main, woh alam kisi ko khuda na de,
Na yeh zindagi meri zindagi, na yeh dastaan meri daastan,
Main khayal o veham se door hoon, Mujhe aj koi sadaa na de,
Mere ghar se door hain raahaten, mujhe dhoondti hain museebten,
Mujhe khauf yeh ke mera pata koi gardashon ko bataa na de,
Mujhe chorr de mere haal pr, tera kya bharosa ae chaaragar,
Yeh teri nawaazish-e-mukhtasar, mera dard aur barrhaa na de,
Mera azam itna buland hai ke paraaye sholon ka ddar nahin,
Mujhe khauf aatish-e-gul se hai kahin yeh chaman ko jalaa na de,
Dar-e-yaar pe barri dhoom hai, wohi aashiqon ka hujoom hai,
Abhi neend aani hai husn ko, koi shor kar ke jagaa na de,
Mere daagh-e-dil se hai roshni, yehi roshni meri zindagi,
Mujhe dar hai ae mere chaaragar, yeh chiraagh tu hi bhujaa na de,
Woh uthe hain le ke khum-o-subuu, aray ae shakeel kahan hai tu,
Tera jaam lene ko bazm main, koi aur hath barrha na de..
The post Mujhe dost ban ke daghaa na de.. appeared first on Ranjish.com.
Mujh se ooncha tera qadd hai, hadh hai,
Phir bhi seenay main hassad hai, hadh hai,
Mere to lafz bhi korri ke nahin,
Tera nukta bhi sanad hai, hadh hai,
Teri har baat hai sar ankhon pr,
Meri har baat hi rad hai, hadh hai,
Ishq meri hi tamanna to nahin,
Teri niyat bhi to badd hai, hadh hai,
Zindagi ko hai zaroorat meri,
Aur zaroorat bhi ashad hai, hadh hai,
Be-tahasha hain sitaare lekin,
Chand bass aik adad hai, hadh hai,
Ashk ankhon se yeh keh kar nikla,
Yeh tere zabt ki hadh hai? hadh hai,
Rokte kyun nahin is ko jaazil,
Yeh jo saanson ki rassad hai, hadh hai..…
The post Mujh se ooncha tera qadd hai, hadh hai.. appeared first on Ranjish.com.
Seena khoon se bhara hua mera,
Uff yeh bd-mast mai-kada mera,
Na-rasaayi pe naaz hai jis ko,
Haaye woh shoq na-rasaa mera,
Ishq ko muu dikhaaon ga kyun-kar,
Hijr main rang urr geya mera,
Dil gham-deeda pr khudaa ki maar,
Seena aahon se chhal geya mera,
Yaad ke tand-o-taiz jhonkay se,
Aaj har daagh jal utha mera,
Yaad-e-maazi azaab hai ya rab,
Cheen le mujh se haafza mera,
Minat-e-chargh se barii hoon main,
Na hua jeetay jee bhala mera,
Hai bara shughal zindagi akhtar,
Poochte ho kya mashghala mera..…
The post Yaad-e-maazi azaab hai ya rab.. appeared first on Ranjish.com.
Hujoom main tha woh khul ka na ro saka hoga,
Magar yaqeen hai ke shab bhar na so saka hoga,
Woh shaks jis ko samajhne main mujh ko umar lagi,
Bichar ke mujh se kisi ka na ho saka hoga,
Laraztay hath, shikassta si ddor sanson ki,
Woh khushk phool kahan tak piro saka hoga,
Mere liye woh qabeelay ko chor kar ata,
Mujhe yaqeen hai yeh us se na ho saka hoga..…
The post Hujoom main tha woh khul ka na ro saka hoga.. appeared first on Ranjish.com.
Kuch to hawa bhi sard thi kuch tha tera khayal bhi,
Dil ko khushi ke sath sath hota raha malaal bhi,
Sab se nazar bacha ke woh mujh ko kuch aese dekhta,
Ek dafah to ruk gayee gardish-e-maah-o-saal bhi,
Dil to chamak sake ga kya phir bhi tarash ke dekh lain,
Sheesha giraan-e-sheher ke haath ka yeh kamaal bhi,
Us ko na pa sake thay jab dil ka ajeeb haal tha,
Ab jo palatt ke dekhiye baat hi kuch muhaal thi,
Meri talab tha aik shaks woh jo nahin mila to phir,
Hath dua se yoon giray bhool gaya sawaal bhi,
Uss ki sukhnn taraaziyan mere liye bhi dhaal theen,
Us ki hansi main chupp geya apne ghamon ka haal bhi,
Shaam ki nasamajh hawaa puch rahi hai aik pata,
Mauj-e-hawaa-e- ku-e-yaar, kar kuch to mera khayal bhi..
A beautiful Ghazal by the great Urdu poet Parveen Shakir.
The post Kuch to hawa bhi sard thi kuch tha tera khayal bhi.. appeared first on Ranjish.com.
Daagh-e-gham dil se kisi tarah mittaya na geya,
Main ne chaha bhi magar tum ko bhulaya na geya,
Umar bhar yuun to zamaane ke masaayeb jhailay,
Teri nazron ka magar haar uthaya na geya,
Roothne wale se itna koi ja kar puuche,
Khud hi roothay rahe ya hum se manaya na geya,
Us ne is tarah mohabbat ki nigaahen daali,
Hum se duniya ka koi raaz chupaaya na geya,
Thi haqeeqat main wohi manzil-e-maqsad jazbi,
Jis jagah tujh se qadam agay barrhaya na geya..…
The post Maine chaaha bhi magar tum ko bhulaya na geya.. appeared first on Ranjish.com.
Tum se ulfat ke taqaaze na nibhaye jatay,
Warna hum ko bhi tamanna thi ke chahe jatay,
Dil ke maron ka na kar gham ke yeh ando-naseeb,
Zakham bhi dil main na hota to karaahay jatay,
Hum-nigaahi ki humen khud bhi kahan thi taufeeq,
Kum-nigaahi ke liye uzzar na chahay jatay,
Lazat-e-dard se aaasooda kahan dil walay,
Hai faqat dard ki hassrat main karaahay jatay,
Di na mohlat humen hassti ne wafaa ki warna,
Aur kuch din gham-e-hassti se nibhaye jatay..…
The post Hum ko bhi tamanna thi ke chaahay jaatay.. appeared first on Ranjish.com.
Misaal-e-khaak kahin par bikhar kar dekhte hain,
Qaraar mar kar mile ga to mar kar dekhte hain,
Suna hai khawb kabhi mukammal nahin hote,
Suna hai ishq khataa hai so kar ke dekhte hain,
Kisi ki aankh main dhhal jata hai hamara akss,
Jab aayine main bann-sanwar ke dekhte hain,
Hamare ishq ki meeraas hai bas aik hi khawb,
To aao hum usay tabeer kar ke dekhte hain..…
The post Misaal khaak kahin par bikhar kar dekhte hain.. appeared first on Ranjish.com.
Hai ishq to phir assar bhi hoga,
Jitna hai idhar, udhar bhi hoga,
Maana yeh ke dil hai us ka pathar,
Pathar main nihaan sharar bhi hoga,
Hasne de usay lehad pe meri,
Ik din wohi nauhaa-gar bhi hoga,
Naadan, na samajh jahaan ko ghar,
Is ghar se kabhi safar bhi hoga,
Zulfon se jo us ki chaaye gi raat,
Chehre se ayaa’n qamar bhi hoga,
Shahbaz main aaib hi nahin kul,
Ek adh koi hunar bhi hoga..…
The post Hai ishq to phir assar bhi hoga.. appeared first on Ranjish.com.
Zabt kar ke hansi ko bhool geya,
Main to us zakhm hi ko bhool geya,
Zaat-dar-zaat hamsafar reh kar,
Ajnabi ajnabi ko bhool geya,
Subh tak vajh-e-jaan-kani thi jo baat,
Main usay shaam hi ko bhool geya,
Ehd-e-vabastagi guzaar ke main,
Vajh-e-wabastagi ko bhool geya,
Sab daleelen to mujh ko yaad rahin,
Behss kya thi ussi ko bhool geya main,
Kyun na ho naaz is zehaanat par,
Ek main har kisi ko bhool geya,
Sab se pur-amn waaqiya hai yeh,
Aadmi aadmi ko bhool geya,
Qehqaha maartay hi deewana,
Har gham-e-zindagi ko bhool geya,
Kya qayamat hui agar ik shakhss,
Apni khush-qismati ko bhool geya,
Sab buray mujh ko yaad rehte hain,
Jo bhalaa tha usii ko bhool geya,
Un se vaada to kar liya lekin,
Apni kam-fursati ko bhool geya,
Khawb-ha-khawb jis ko chaha tha,
Rang-ha-rang ussi ko bhool geya,
Bastiyo ab to rasta dedo,
Ab to main us gali ko bhool geya,
Us ne goya mujhi ko yaad rakha,
Main bhi goya usi ko bhool geya,
Yaani tum woh ho waqeyi ? Hadh hai,
Main to sach-much sabhi ko bhool geya,
Ab to har baat yaad rehti hai,
Ghaliban main kisi ko bhool geya,
Us ki khushiyon se jalne wala Jaun,
Apni eeza-dahi ko bhool geya..…
The post Zabt kar ke hansi ko bhool geya.. appeared first on Ranjish.com.
Bassti tujh bin ujaarr si hai,
Kambakht yeh shab pahaarr si hai,
Shayed ke hui sarayet-e-ishq,
Kuch seenay main cheer-pharr si hai,
Har-chand ke bolte nahin woh,
Baham par chairr-chaarr si hai,
So rehte hain aik sath lekin,
Talvaar ke beech aaarr si hai,
Insha-Allah aaya shayed,
Iss kuchay main bheerr-bhaarr si hai..…
The post Bassti tujh bin ujaarr si hai.. appeared first on Ranjish.com.
Mohabbat ki aseeri se rehaayi maangte rehna,
Bohat asaan nahin hota, judaayi maangte rehna,
Zara sa ishq kar lena, zara si aankh-bhar lena,
Iwwaz is ke magar saari khudaayi mangte rehna,
Kabhi mehroom hontton par duaa ka harf rakh dena,
Kabhi wehshat main us ki na-rasaayi mangte rehna,
Wafaaon ke tasalssul se mohabbat rooth jati hai,
Kahani main zara si bewafaayi maangte rehna,
Ajab hai wehshat-e-jaan bhi ke aadat ho gayi dil ki,
Sakoot-e-shaam gham se se humnawaayi mangte rehna,
Kabhi bache ke nanhe hath par titlee ke par rakhna,
Kabhi phir us ke rangon se rehaayi maangte rehna..…
The post Mohabbat ki aseeri se rehaayi maangte rehna.. appeared first on Ranjish.com.
Babarbar se bach ke guzar jaane wale,
Yeh naaley nahin be-assar jaane wale,
Nahin jaante kuch ke jaana kahan hai,
Chale ja rahe hain magar jaane wale,
Mere dil ki betaabiyan bhi liye ja,
Dabbay-paaon muh phair kar jaane wale,
Tere ik ishaare pe sakit kharre hain,
Nahin keh ke sab se guzar jaane wale,
Mohabbat main hum to jiye hain, jiyen ge,
Woh hon ge koi aur mar jaane wale..…
The post Babarbar se bach ke guzar jaane wale.. appeared first on Ranjish.com.
Uski hassrat hai jise dil se mitaa bhi na sakoon,
Dhoondne us ko chala hoon jise paa bhi na sakoon,
Daal ke khaak mere khoon pe qaatil ne kaha,
Kuch yeh mehndi nahin meri ke chupaa bhi na sakoon,
Zabt kambakht ne yaan aa ke gala ghonta hai,
Ke usay haal sunaaun to sunaa bhi na sakoon,
Naqsh-e-pa dekh to loon laakh karoon ga sajde,
Sar mera arsh nahin hai jo jhukaa bhi na sakoon,
Bewafa likhte hain woh apne qalam se mujh ko,
Yeh woh qismat ka likha hai jo mitta bhi na sakoon,
Is tarah soye hain sar rakh ke mere zaanu par,
Apni soyi hui qismat ko jagaa bhi na sakoon..…
The post Uski hassrat hai jise dil se mitaa bhi na sakoon.. appeared first on Ranjish.com.